30歲少年看香港：一世樓奴冇錢移民

網圖

如果學羅致光話齋，60歲係中年，咁小編而家30歲直頭係少年。活到幾多歲，我控制唔到，想長命百二歲？千祈唔好，越長命，即係供多幾年樓捱多幾年騾仔？

做香港人好慘，一生營營役役，就係為咗一個家。我親身聽過：「買完樓生埋個囡我人生已經玩完，每食一餐飯諗起要慳返啲錢供樓，每一啖飯都係眼淚。」我有幸，唔晒供樓，所以每個月一出糧可以大魚大肉，無後顧之憂，咁樣先係生活。

仲有一班唔想留喺香港，但又唔夠錢移民嘅人。講真，要移民首先你有一定嘅財力，而且去到另一個國家要重新適應，朋友親人又未必會跟埋你移民，名利工作咩都要重新嚟過。唔似得外國國家，例如英國，你唔想住喺倫敦，可以搬去曼徹斯特，再唔鍾意可以去利物蒲、劍橋，外國地方大，唔同城市有唔同褔利唔同文化。如果喺香港，唔通屯門搬去旺角，就會係好大嘅轉變？喂，咪又係住緊500呎劏房。

小編就冇能力移民外國，更加冇能力喺香港買獨立屋，唯有download一張外國別墅嘅wallpaper，都算係一種推動力！