90後看樓市 - 看不見未來

90後青年

互聯網圖片

作為一個啱啱畢業嘅大學生，踏入社會工作已有半年，都慢慢開始感受到香港人嘅住屋問題。小弟好幸運出身喺一個小康之家，住喺家庭嘅自住物業，暫無容身之所嘅煩惱。

不過小弟將來都要成家立室㗎，唔通繼續同屋企人住埋一齊咩。早前網上有篇文，話冇樓真係唔好結婚，入面提到同家人同住嘅煩惱，冇自由度、屋企好多人好迫等等，引嚟大批網民嘅共鳴。的而且確，新婚夫婦冇自己嘅私人空間，除非雙方容忍度好勁，否則新婚期後一定出事，輕則家嘈屋閉，重則永無寧日。

咁解決方法得兩個啫，出去租樓或者買樓。為咗將來嘅幸福，小弟都開始儲錢。不過呢，小弟現時月薪萬三蚊，家用去咗4千，再加食飯、交通、雜費等，平均可以月儲5千5，到我8年後最少可以儲52萬，咁我相信我都會加人工嘅，樂觀諗唔會儲到咁少，可能都會去到80萬，咁但係80萬可以做到啲咩？

我諗一間正常嘅物業都買唔到呀，我當我女朋友都有儲返咁上下，大家有夾埋有160萬，依家勉強嚟講先俾到似樣300零呎嘅新界山卡啦樓首期咋，市區就得返啲舊到有返咁上下嘅樓或者係新樓納米盤。舊樓隨時大把嘢維修，條數唔襟計，住納米盤嘅話，個居住環境又係咁迫抾。租樓嘅話咪即係幫人供樓啫，盡可能都擁有自己物業啦。

有啲人就會話十年後唔知咩世界啦，我覺得呢句廢過廢話，我望到依家個樓價咁癲，雖然開始有回落，但仲處於極不合理水平，個心已經冇哂希望，仲要係度自我安慰話十年樓市幾番新，冇打消買樓念頭已經偷笑，事關身邊有啲朋友已經講明住一世公屋算，或者拎儲嚟嘅錢去旅行仲好。

坦白講，出嚟做嘢已經半年，望到啲樓市、土地新聞，個心都咪話唔灰。香港人不吃不喝要成廿年先買到樓，政府又倒哂香港嘅錢去填個明日大嶼出嚟，最快2032年入伙，等到蚊到瞓。另一邊廂四大發展商坐擁大量農地儲備，政府又唔收，棕地政府又冇心搞，把口就話有決心解決土地問題，講就天下無敵，連大商家都唔敢搞，做就無能為力。

唉...