住私樓係港人核心價值

畢二居

Internet photo

香港地唔夠、樓唔夠，係未大幅增加土地供應前，點樣分個餅都係一個問題。最近有團體要求減少私樓比例，又有消息話要係鐵路上蓋增建公屋。不過，港人想住私樓，呢個亦係大家努力的動力，若然將興建公營房屋的比例增加，對辛苦儲錢想上車的私樓買家又係唔係公平？

本港向來係公私營房屋雙軌制，兩者比例亦唔係斷估訂下來。長遠房屋策略督導委員會以往曾詳細研究及討論，先至得出六四比例，以照顧社會上不同階層人士的住屋需要，呢個唔係話鐵板一塊的祖宗家法，一啲都唔可以變，但點樣變、點解變就要有解釋同清楚理據。

香港現在土地不足，公屋條隊愈來愈長，私樓上車愈來愈難，兩條隊的用家都有訴求，如果總體供應無增加，只係調整比例，就即係個餅無大到，只係點樣分餅，咁有人分大塊咗，自然有人就受損。本來，在增加公屋供應的同時，不應減少私人房屋的供應，咁先唔會出現不患寡而患不均。

要求政府改變公私營比例的團體會以新加坡做例，認為當地公營房屋佔近九成市場，市民可以買類似居屋的組屋，香港一樣可以倣效。

新加坡可以做的，香港是否可以做，又或者是否應讓做呢？不能只看一項政策。新加坡是政府主導，私營經濟只係輔助角色。新加坡的上市公司，很多都是類似港鐵的國家資本企業，根本沒有甚麼大老闆，所以新加坡人缺少創業精神，個個習慣做順民。新加坡的做法是政府有飯俾你食、有屋俾你住，市民就唔好咁多意見。

香港就唔係咁，奉行小政府政府，如果香港公營房屋比例不斷提高，等同放棄高地價政策，咁加稅無可避免。而且公營房屋主導，即係傾向平等主義，人人差不多，但香港人喜歡有機會，有能力者住私樓，大家坐擁千萬身價物業，就算唔賣都覺得滿足，呢種心態唔係一時三刻可以改變，所以把私樓地轉去做公營房屋，講出來好聽，實行後係咪真係受市民歡迎，又是另一回事。