何柱國踢爆皇帝的新衣

畢二居

網圖

全國政協常委何柱國有「串嘴王」之稱，早前他趁覓地小組交報告之前，公開炮轟小組浪費時間，皆因香港邊度搵地，如何搵地，根本唔使問都知，關鍵只係有無決心。

何柱國認為，覓地實際可行的就是填海、採用公私營合作模式發展農地，以及適度發展棕地，覓地小組做大龍鳯諮詢根本無用，「廢嘅」。他最不滿小組成日掛住話發展粉嶺高爾夫球場，實際球場有很多古樹古墓，發展效益很低，無可能發展。

同一場合，其實特首林鄭月娥都在有現身，她在回應時強調，專責小組是自己委任，至今小組最成功是令公眾對於缺地產生危機感。林鄭雖然表面上支持覓地小組，但事後心水清者就睇到，何柱國提及的兩個可行覓地方案，認為毋須諮詢都已有共識，其實林鄭根本無提出異議。

事後另一個分析，係要增加短期供應，公私營合作幾乎係唯一選擇，而家就要睇小組點樣去撮成呢個共識。至於是否發展商球場，則不妨學特首所講「拭目以待」。

覓地方案似乎寫在牆上，實在無需再等報告就可知道。睇番政府剛剛又宣布啟動棕地發展的研究，好多選項都唔使等小組報告就已開動，林鄭話諮詢做到增加公眾對缺地的認識，呢樣擺明係俾面，因為樓價升成咁，個個都話無地，唔通咁仲唔夠危機感？有人話，覓地小組無乜作用，好多人都已經睇到，政府見勢色唔對亦早早跳船，提前開動不同方案，何柱國只係做了講真話的圍觀者，大大聲踢爆皇帝的新衣，原來係無著衫周圍走喎。