假盤打交個名臭 代理龍頭諗計自救

圖︰蘋果日報

中原老闆施永青自爆話行內造假問題猖獗，「16萬個放盤，得1萬個係真」，筍盤都係引買家上釣嘅魚餌。佢又話行內4萬個代理但地監局得百幾人，好難睇得晒，局方嘅數字反映唔到真實情況，都係要靠業界自律，所以同利嘉閣一齊推出「真盤源」計劃，明剃地監局眼眉。

首先唔好理施永青嘅言論係咪幫佢哋個計劃賣廣告，現實見到嘅係地產代理行內確實良莠不齊。筆者路過新樓盤，都會見到一班身穿西裝，但一臉稚氣嘅MK仔拉客睇樓，亦經常聽聞新盤現場有代理對睇樓客死纏難打，成班衝出馬路派卡片，最離譜係有代理為求開單當眾跪地，或者同行大打出手，被拒絕時甚至向客人惡言相向。總總惡行，罄竹難書，直係好難相信佢哋係要考牌嘅專業代理。

現時樓市二手交投疲弱，主要靠一手盤搵食，但代理持牌人數就創新高成3.9萬人， 平均每5個人爭一張單，開唔到單靠微薄底薪真係好難生存，自然出現咁多騎呢搶客手法，同施永青口中嘅假盤誘客問題。但如果代理業界繼續容許劣質經營手法，盞將買家推向網上買賣平台嘅懷抱，難怪兩大物業代理公司都要諗計自救，挽回多少聲譽。