又一個在大陸發跡的地產好友

畢二居

internet photo

住宅市場呢排吹冷風，東涌一個特色單位減價出售做了財經報紙頭條。不過，看淡之風吹起下，幾日前開標的啟德地就爆出一個不大不小的冷門，賽果証明香港有兩多，一是臥虎藏龍，有錢人多 ; 二是看好地產，敢落重注的好友多。

呢塊前啟德機場的跑道地皮，由高銀集團附屬公司迅富國際有限公司以89億元投得，呢間一般人唔係咁識的公司，出到樓面呎價15497元，屬市場預期之內，為區內賣地表住宅地次高，結果成功擊退大熱門新世界、會德豐地產、恒地（00012）和帝國集團組合，以及長實（01113）、新地（00016）、建灝地產、中國海外（00688），還有嘉華國際（00173）夥拍信置（00083）等6個財團。

月初，同屬跑道區的官地由新世界和會德豐地產牽頭的重量級財團，以83.33億元投得，樓面地價14502元，今次地板位置稍靚，但價錢就高出近7%。雖然有了先前的參考價，今次的價錢唔算特別高，但突然冒出一個大家唔係好識財團，「大嗱嗱」用89億元投地，多少都令人意外。

投地公司唔係咁多人識，後來買家自揭身份，是由上市公司高銀金融佔60%權益，其餘40%則由高銀老闆潘蘇通持有。底牌揭開後，普通人都仲係一頭霧水，地產界就「哦」一聲，因為呢個買家雖然係新晉，但都唔係無來頭，之前這個組合就用過124億元搶走何文田地王，後來潘蘇通仲向上市公司買入所有股價。現時何文田項目都仲未開售，潘蘇通就已經再下一城，現時市場最有興趣知者，就是他在啟德建立橋頭堡後，會否重演海航高價搶地的故事。

潘蘇通一向低調，但在股壇都有些朋友。他近年持續在九龍灣買入物業，前後都有幾年時間，所以對本地樓市不是無認識，同時証明有一定持貨力。究竟他點解咁有錢，有識他的人回應，只能說人不可以貎相，想不到他回大陸投資幾年，就變成錢好像用不完的財主佬。