唔想娥六招失效 新居屋應加輪候制度

網絡圖片

今期居屋大抽獎將會喺呢個星期四就揭盅，抽得中自然爽歪歪，52折買到啟德同長沙灣靚地段，但4000幾人開心同時，29萬個抽唔中嘅申請者難免失望。有專家話，呢班向隅客只要有1至2%回流私樓市場，都足以掃清市場上嘅減價盤，令細價樓止跌回升。官員都應該擔心呢個情況出現，令到娥六招辛辛苦苦壓低既樓價，三兩下手腳打回原型，所以即時話俾大家知，今次抽唔到唔洗驚，出年4月又有大抽獎，仲加碼到6000個單位，等多陣先啦

出年推出嘅新居居居苑，包括位於何文田常樂街、長沙灣發祥街、荃灣德士古道、將軍澳南同粉嶺皇后山，總共6,528伙，其中常樂街、長沙灣同將軍澳項目，吸引力唔會細過今期推出樓盤。另外， 政府最新文件亦顯示，房委會未來5年會提供2.46萬居屋單位，其中2022/23年度落成嘅兩個居屋選址，包括鑽石山大磡村舊地皮同沙田安睦街。

話需如此，但相比起1978至2002年間，政府每年平均推售2至3次居屋，平均每年推出1.2萬伙，現時嘅居屋供應仲係差好遠，政府只係靠畫餅充飢，俾個希望大家「你宜家無，但將來會有」，令一班想上車嘅邊沿家庭推遲置業計劃，等候將來可能抽到嘅平居屋。

但最大問題係，政府無為居屋申請者加入輪候制度，次次都好似六合彩咁要靠彩數，結果有啲家庭抽咗幾年都落空，年年挨貴租。如果當局俾到申請人一個清晰時間表，知道最多等幾年一定有機會買到居屋，黑仔王都有做業主嘅機會，唔洗係私樓市場搶樓，相信到時樓市會更健康。