土地債券只會令政府孭一身地債

網圖

全城討論公私營合作發展新界農地議題之際，近日有學者提出由政府發行「土地債券」，吸引發展商將農地交俾政府，釋放新界土地起屋，日後發展商可以債券換地。聽落好似有得諗，諗真啲其實只會引來日後更大嘅問題。

當年港英政府無錢買地又要發展新市鎮，發出換地權益書係無辦法中嘅辦法，當年好多發展商發跡都係因為買埋買埋唔少換地書，政府好唔容易先喺回歸前還清地債。今時今日，政府又唔等錢洗，發展新界農地點解唔直接用土地收回條件，反而要欠落一身地債？

其實發展商目前囤積嘅農地，都係早年好平買落，一日唔補地價都只可以曬太陽，釋放唔到價值。如果政府真係用「土地債券」同發展商換農地，即係發展商明明手持新界冇配套、未補價嘅地皮，但就可以用嚟換取將來市區嘅靚地，同時囤積土地會更容易，宜家囤地都有成本，但囤積「土地債券」成本都慳返，真係有冇咁大隻蛤乸隨街跳。

發展商計數無死錯人，從佢地宜家嘅賣樓策略可見一斑，可以預見如果有咗「土地債券」呢件利器，以後嘅政府努力搵地都只係為咗還地債。