居屋大抽獎後 大批購買力真係回流私樓？

網絡圖片

呢幾個月樓市終於識跌，好多本來上唔到車嘅市民好似有返希望。有個樓市專家警告，今次調整係最後上車機會，唔把握的話，等居屋攪珠結果公布，到時購買力回流細價私樓，掃清晒啲劈價盤，揼心口都冇用。但另一邊箱又有好多人話樓市仲有排跌，搞到上車客心情忐忑。

究竟居屋攪珠後，係咪真係可以釋放大批購買力？睇返房委會公布數字，今期居屋有大約26萬份申請，超額58倍，計埋郵寄隨時有30萬份申請，但單位得4000幾個。落空嘅申請家庭有成29萬，睇數字真係好得人驚。

不過諗真啲，呢30萬申請入面，有10萬份係政府減到52折先至補飛入表，相信當中唔少人係見到折扣加大先抽埋一份，佢哋又未必真係會對私樓市場有興趣。等於百貨公司大減價，總會吸引到好多人唔買都睇下，但等唔等於佢地會買正價貨？

餘下既十幾萬份申請中，綠表有數萬份。呢班申請者入面好多都有間公屋，有幾多人會跌市時入市？成疑。唔好忘記，好快又有得抽綠置居同首置盤。

根據過去經驗，餘下嘅白表申請者中，6成都係單人入表，單人資格入息上限月入28,500元，呢份人工想係宜家嘅樓價過壓測，難矣。唔少家庭分拆成幾個單人資格申請，想增加中獎機會，所以10幾萬單人申請有唔少水份，就好似近期新盤既入飛數字，幾百入份，最後賣揀樓得幾個人出現咁囉。

香港人好得意，樓市升到癲時就有無限剛需，樓市一掉頭向下，啲剛需原來又唔係幾剛。不妨睇吓啟德煥然壹居，16年推出時正值樓市調整，個陣最平一萬蚊呎，但大批中籤者放飛機，賣咗成個月都仲有單位揀。宜家睇返，一萬蚊呎買到啟德，個個都狗衝！

居屋係一年一度上車盛事，唔少人覺得俾200蚊買個希望都幾好，唔中下年又嚟過囉！當然中間都有人真係有置業需要，但足唔足以令樓市由跌轉升？好快就有答案！