居屋根本無平賣

畢二居

特區政府推出房市六策，事前講得沸沸湯湯，話係樓市辣招，結果証明無料到。最重炮的一招一手空置稅俾另一招抽起土地私樓地起資助房屋化解晒，而且仲要拖一年立法先至實行。徵稅手軟軟，政府將焦點轉咗去居屋減價，聲稱咁樣可以幫市場買到負擔得起的住宅，但睇真其實又係搵笨。

政府宣稱居屋會「平賣」，最後揭盅，原來係加大折扣，咁即係話業主買樓時係小俾咗，將來賣樓時就要俾番足原本無俾的折扣。預日慳咗，預定要還，就係呢個政策的精髓。

港人平時做人精靈，但數口永遠精唔過官員。好多人聽到話折扣大咗，仲以為「筍咗」，問多啲折扣唔係好咩？大佬，若然折扣大咗等如真係俾小啲梗係好啦，但買居屋如果價錢一樣，折扣大咗，咁咪即係貴咗唔係平咗，但呢條數好多人都唔識計。同樣道理，呢次特首叫房委會「平賣」單位，其實買家而家俾少咗，但等如收的折扣大咗，將來賣樓要俾番多啲，根本無著數。

「平買」居屋唔止無著數，仲好大機會蝕底。大家買樓背後有兩個個信念，一係銀紙唔值錢；二係買樓價升值。根據呢個理念，買樓最好係借錢，因為借錢買樓將來用唔值錢的銀紙償還，自己從中就賺到樓宇升值。呢個信念過去一直都啱，如果大家唔信佢將來繼續啱，咁就要三思，諗吓而家樓價咁貴下仲應唔應該買樓。如果大家相信銀紙會唔值錢，樓價會升值，咁而家買一層銀碼平咗，但業權同樣少咗一截的樓，究竟係蝕底抑或著數？

再舉過簡單例子，如果有人去買私樓，佢而家俾咗三成首期。明日另一個買家去買，發展商話准佢俾一成首期，但將來如果樓價升咗佢買樓，要分佢兩成利潤，咁叫唔叫賣平咗呢？

有人會話，我買居屋係要嚟住啫，如果永世唔賣，咁咪永世著數咗囉。咁講聽落好似係，但唔好忘記，居屋講明只能自住，到而家為止都唔准租俾人，一個權利換一個義務，講到底都係無著數，所以話班房策官員的密底算盤，係永遠都唔會益我哋小市民。