「山竹」大破壞 政府仲要向大自然開刀？

為期5個月嘅「土地大辯論」接近尾聲，近日嘅公聽會就有百幾名團體同市民出席，炮轟政府向郊野公園大自然開刀。其實經過「山竹」搞到香港滿目瘡痍，大家仲對大自然有咩感覺？

林鄭曾經講過，長遠為香港土地提供足夠供應，填海似乎係無可避免。不過經過「山竹」襲港後，會唔會再諗清楚先呢？

「山竹」來臨嗰日，好好彩香港並唔係處於天文大潮，如果唔係，水浸會比今次至少升高一米，大家睇片都見到，杏花邨、將軍澳、柴灣呢啲近海邊嘅地方，直頭好似「明日之後」海嘯咁，沖到海邊嘅設施爛晒，杏花邨仲變成發泡膠垃圾城。

幻想一下如果繼續填海、起人工島，周圍都畀海水圍住，香港仲能唔能夠頂多幾次好似「山竹」咁勁嘅風？如果嗰個係人工島，海水會唔會升到淹沒，甚至破壞連接市區嘅路，令人工島變成孤島呢？

除咗填海出事，「山竹」仲破壞咗我哋嘅大自然環境，淨係塌樹報告都15,000宗，學者話呢啲樹唔係靚木造唔到傢俬，惟有葬身堆填區，你話可唔可惜？無咗啲樹，雀仔蜜蜂無家可歸，你話我哋嘅生態變成點？

專家話香港隨時每年都會遇到好似「山竹」嘅強颱風，天災侵蝕咗我哋嘅大自然，如果政府仲要向郊野公園開刀，香港只會剩低石屎森林。