房委會建屋數字似盤冷水照頭淋

網圖

呢期講得最多嘅房屋議題，一定係「娥六招」究竟有冇效，好多想上車嘅人都讚政府終於醒，將居屋售價同私樓脫鈎，覺得人生有返啲希望。但睇完啱啱房委會公布嘅建屋數字，心情又跌返落谷底。

政府一直話努力增加供應，但房委會截至今年6月嘅出爐數據，未來五個年度公營房屋建屋量，繼續遠少過《長遠房屋策略》定下每年2.8萬個單位嘅目標。2022/23年度更低到得返可憐嘅1.48萬個，只到目標一半，資助出售房屋更得1,500伙。

啱啱先有居屋五二折嘅好消息，但轉頭房委會就用現實呢盤冷水兜頭淋落嚟。一班心急如焚嘅市民，諗起仲要等土地供應小組做埋個諮詢，搵地唔知搵到幾時，再睇埋房委會數字，真係心都實晒。

好多人心入面個句其實係，填海、收回高球場、徵用棕地、開發郊野公園邊陲，乜都好啦，短中期全部一齊做啦。但如果等多幾個月先出報告，結論又係冇共識，到時真係冇眼睇。問民怨係點嚟？咪就係咁嚟囉！