抽居屋等足七年，值得嗎？

高尼

網圖

根據房屋委員會提供的數字，截止今年3月底，按現時全港共有15.33萬人申請緊公堅，平均輪候時間多達5.1年，就算是單身的長者都要等2.8年，相信大家亦明白以現時公屋建屋量，要輪候公屋自然需要等4、5年，不過筆者更加想講居屋的輪候時間。雖然購買居屋可以每次都申請，但抽唔抽到就要睇「彩數」，抽中又揀到心儀單位，可能要抽足四、五年，隨時等5年都未必中。

相信大家亦明白，現時樓市處於「三低」時期，低息、低通脹加低失業率，令整體樓市剛性需求有增無減，市場對於住屋需要一直存在，亦令社會置業難的問題更見壓力。

三低同時，亦出現「三難」局面，上車難、儲首期難、抽居屋同樣難，隨時抽足四、五年都未抽到新居屋，「三低」、三難」是整個社會共同面對的困局。

上月底政府公布房策新措施，除開徵一手空置稅，資助房屋方面，一方面增加供應，同時亦決定將定價與市價脫勾，新一期居屋的定價即時下調，以啟德啟朗苑為例，原先入場費要227萬元，現時減價至169萬元，減幅逾25%，對於一眾居屋準買家而言，肯定是天大喜訊，即使售樓限制增加，但日後供樓肯定輕鬆好多。

想深一層，其實呢個方案「有so有唔so」，售價平咗，但申請人數亦肯定多左，早前已接受申請的新一期居屋，原先已經有14.5萬人入表，打破14年復售居屋以來紀錄，但由於售價下調，10月會再接受申請，到時可能再多5、6萬人申請，隨時有20萬人爭4,431個單位。

現時抽居屋可能要等4、5年，我相信日後起碼等7年，一、兩次就抽中機會渺茫，不過始終售價大減，即使明知機會渺茫，但合資格的買家肯定會博一博。最慘係抽極唔中，但人工又加咗，月入超出申請上限，到時私樓售價又貴咗，隨時既無資格買居屋，又唔夠錢買私樓，兩頭唔到岸，就要閣下自行計數。