減私樓比例真係會推高樓價？

網圖

特首林鄭月娥第二份施政報告，房屋政策係重頭戲，人工島講到爛，反而想講吓公私營房屋比例改成七三同容許工廈改成過渡性房屋嘅見解。

公營房屋比例增加，基層家庭第時可以買大折扣綠置居、居屋同首置盤，少咗要動員全家積蓄買納米私樓嘅需求，首當其衝受影響嘅肯定係宜家賣到貴一貴嘅納米盤，同個價脫離現實嘅居二市場公居屋，呢兩年追價買咗呢類單位嘅買家，真係祝佢哋好運。

唔少好友話，私樓第時得返三成，供應唔夠樓價實繼續gogogo，但係實情係私樓細單位同未來嘅資助房屋供應重疊，你話普通上車客，寧願平啲買4-500呎居屋，定同你買個200呎私樓單位？政府拎返細價市場自己做，發展商就主力供應中大型單位同豪宅，連九建都話納米盤第時會絕跡市場，私樓冇咗細價樓上車客市場，供應比例少啲其實冇乜影響。

另外，過去買細價樓改裝劏房嘅投資者，見到大批工廈單位將變做住宅租盤推出市場，唔少仲位於市區，租金受壓影響回報，會唔會出貨止賺離場？好多人幾個月前都話林鄭嘅空置稅無效，但事實話你知，出完招後樓價連續回落。

今次施政報告一改過去10年嘅房屋政策，由不停加辣阻你上車，變成有求必應餵飽上車需求，加上經濟大環境急轉，仍然以樓價只升不跌做信仰嘅人，真係扣好安全帶。