星洲組屋住得舒適 香港公屋相形見絀

網圖

有睇開電視嘅都知道，兩年前曾主席同長毛一齊去旅行引起眾人議論，近排佢地兩個又一齊出埠，不過今次就唔係再去波蘭旅行，而係去新加坡睇人地嘅組屋。

曾主席同長毛參觀咗新加坡著名嘅組屋－－達士嶺，佢出名係邊呢，首先佢係全國最高嘅組屋，其次係 7 幢住宅大樓組合而成，中間樓層同天台都有空中花園連埋一齊，設計得非常出色，如果唔了解當地嘅遊客去到，就咁睇，仲以為係私人發展商起嘅私人住宅大樓。

佢地隨後仲訪問一個家庭，3 個人住 1,100 呎，你都咪話唔羡慕。而攝製隊亦係街隨機訪問左住係組屋嘅人，冇一個人係話組屋唔好，當中有人講到，因為新加坡政府要市民居係一個舒適、實惠、安全嘅環境。

睇到呢度，我不禁自慚形穢，老實講，新加坡立國初期嚟香港取經，學習香港嘅公屋發展，但差唔多一個甲子過去，現在倒返轉，新加坡嘅公屋已經青出於藍勝於藍。我諗你問 10 個住係香港公屋嘅人，我諗11個都係唔滿意。

節目入面有個設計師講到，新加坡政府關注在高密度住宅是否宜居，於是提供更多公共空間。反觀香港，依家嘅公屋千篇一律，可以話係毫無美感，公共空間又唔見得有好多。回想港英年代，都會建造一啲獨特嘅公屋，好似勵德村嘅圓筒型公屋、 外牆多彩嘅彩虹村等。

或者有人話，依家居住問題嚴峻，唔好搞咁多嘢啦，拿拿聲起快啲，等所有人都有安居之所仲好啦！回顧六、七十年代，當年住屋問題都嚴重啦，大把人住寮屋啦，又唔見嗰時啲人起埋一式一樣嘅公屋？最重要，係睇政府肯唔肯花心思搞好佢啫，至於依家個政府有冇心，就留返俾各位自行評價嘞。