有樓奴 有糖派

畢二居

網圖

今年<<施政報告>>，特首林鄭月娥揀了雙十節公布，屆時焦點之一當然是土地問題。林鄭呢排有啲黑仔，山竹訪港本來係攞分機會，但因為拒絕停工搞到民望跌到出現負值，所以佢誓言要係<<施政報告>>攞番分。

係林鄭出招前，政府先公布新一季賣地計劃，係十月至十二月季度內，政府收起「一鐵一局」項目，推出的住宅用地只有四幅，提供約二千六百三十伙。計劃公布後，有人計過數首三季推地量提供約九千八百多伙，僅及政府全年推地目標逾半。發展局局長黃偉綸表示，因應政府將部分私宅地撥作資助房屋，因而影響推地量，言下之意，似乎仲有一季都無乜機會追番條數。

過去兩年政府死谷推地，呢屆政府就抖哂氣。地產界覺得，當局係睇到未來兩年是供應高峰期，所以唔再大力推地，呢個睇法就再次說明，政府係唔會放棄高地價政策的。

林鄭上場後，曾表明會增加公營房屋數量，改變六四的百分比，呢個做法其實係零和遊戲，加了公營房屋，就少了私樓。呢個效應係今次賣地已經見到，認真係快過打針。今個<<施政報告>>有說法會增加女仕的產假，辦法係由政府用公帑資助。呢個做法打工仔開心，老闆亦唔會介意有人幫手增加福利，但咁樣又要使一大筆公帑，咁錢又從何來呢？

現屆政府咁手爽，主要都係過去幾年樓價飊升，賣地收益狂增，積起大量儲備，所以如果樓市唔得，賣地價跌，又何來公帑派糖，所以女仕們產假多咗，真正要多謝係一班樓奴。所以，未來派糖愈多，高地價政策就愈不能放棄。