東涌大填海 林鄭最啱聽

畢二居

網上圖片

團結香港基金呢個月出招，建議在大嶼山東部填海超過二千二百公頃。有環保團體立即還擊，質疑團結香港基金漫天索價，以一個超大型的墳海計畫為政府的填海工程開路。 俗語話一件污、兩件穢，現時填海難過登天，既然要做就不妨去得盡啲，好過搞乜嘢收高球夫球場呢啲細眉細眼嘢。

團結香港基金發表報告，提倡推行「強化東大嶼都會」 計畫，選址大嶼山東部水域填海逾二千二百公頃，興建四十萬個新住宅單位。由於呢個建議係前特首董建華支持，董伯伯又係特首選首同林鄭有過深情抱抱，所以呢個時候團結基金走出嚟建議巨型填海方案，就令人有鳴鑼開路之感。

香港地小人多，幾十年前的教科書都已經教，一向以來都靠大型填海造地。團結香港基金報告中提到，在很多與香港差不多處境的地方會填海造地。好似新加坡近年積極填海，不計過去填海數量，未來計劃新填面積與今次建議的面積不相伯仲。深圳同樣準備在未來一段時間準備填海。人家個個填海，香港自己死守住唔郁，搞到港人無地方起樓，咁係明智抑或目光如豆，只睇到自己前面兩尺呢？

香港四鄰多個地區都在填海造地，唯獨香港停滯不前，令地價日益高昂，年青一代無哂希望。團結香港基金認為方案一大賣點是其可行性高，提出的填海選址非常合適，既避開中華白海豚，而且便捷。基金咁講雖然有點賣花讚花香，但對一心想填海造地的特首來講，可能就最啱聽。

團結香港基金大膽倡議填出二千多公頃土地，雖然對紓緩短缺有相當大的幫助，但以香港現時程序之多，由落實到有樓住，恐怕無十年八年不成事，如果再拖，咁就不知拖到何年何日。當年，董伯伯做特首，曾立下宏願人人有樓住，個個做業主，結果搞出八萬五，最後好心做壞事俾人鬧到腳痛，但佢對港人住屋似乎一直放係心上，呢次佢撐林鄭做特首，又係需要時刻打哂鑼敲話要大舉填海，特首要係《施政報告》推出填海大計，已經唔使等做嘢慢騰騰的覓地小組報告啦。