林鄭唔郁高球場？麻煩施政報告咪渣流灘

網圖

搵地諮詢結束在即，今日星島獨家報道，話政府傾向唔郁粉嶺高球場，理由係球場對香港體育發展有貢獻，地皮難做高密度住宅發展，入面嘅古樹古墳有保育價值云云。

呢啲理由，實在難以令人信服，起高鐵前都好多環保人士話會破壞米埔生態啦、拆皇后碼頭有冇因為歷史價值而手軟？仲有忽然關心體育發展前，記唔記得前特首CY話體育界對經濟冇貢獻？放在眼前嘅事實係，政府想做嘅無論幾大難度都要格硬做，唔想做嘅就搵呢樣搵個樣做擋箭牌。唔收返高球場，實在唔可能唔信政府係怕咗權貴。

高球場之所以應該收回，唔止係因為有成170公頃土地，更係因為佢為特權服務嘅形象太突出，政府監平監賤出租，但會籍炒到天價，一般市民根本難以使用。最重要嘅意義係，可以顯示政府為咗幫市民解決住屋問題，係可以向特權階層Say No。

林鄭成日呻香港冇地，又怕同發展商打官司、又要搵地安置棕地作業、填海又要十年計嘅時間。好啦！收返高球場，只需要租約到期前通知，唔洗打官司更唔洗賠償，係短期供地嘅最易方法。收返高球場，仲唔怕政治唔正確，內地政府近年都收返好多高球場，最近深圳政府先收返深圳高球場重新規劃用地，連阿爺都視高球場係整頓對象，點解呢點我哋又唔跟？

搞咁大壇搵地大龍鳳，若果政府最終都堅持完封不動保留粉嶺高球場，咁下個月嘅施政報告，林鄭真係要拎到好具體有力嘅增加短中期土地供應方案出嚟，市民先會收貨。一旦又係冇料到，或者只靠填海十幾年後先有地，咁唔該特首唔好再話自己眼中只有公眾利益，冇欠任何人，真係難聽過粗口。而等上車嘅市民，就自求多福吧。