林鄭學吓星洲 納米樓應成歷史

新加坡政府最新宣布，日後新樓私樓單位平均面積唔可以細過915呎，打擊發展商起「鞋盒屋」。發展商唔可以起啲面績細但呎價貴一貴嘅單位，以防推高樓價。

相比起新加坡，香港嘅發展商真係身處天堂，近年盡顯賺到盡嘅本色，唔單止唧牙膏式賣樓，囤積居奇，造成私樓供不應求嘅局面，單位仲越起越細，百幾呎嘅納米盤呎價驚人，好多買家用盡畢生積蓄，只能買到一個車位咁大嘅單位。

上屆梁振英政府，為咗跑夠單位供應量，對納米樓隻眼開隻眼閉，但事實證明發展商你唔管制佢，真係幾細嘅則佢都畫得出。8月份林鄭做施政報告諮詢， 長和主席李澤鉅仲投訴話，政府嘅招標限制，搞到發展商要起大單位，想放寬限制。據知林鄭都反問「咁係咪要起多啲納米樓？」 。

既然林鄭政府以新加坡做房屋政策學習對象，未來增加公營房屋供應，將上車盤收返嚟俾政府自己做，希望政府都參考吓今次新加坡政府嘅做法，雖然香港現實條件唔容許間間屋都8-900呎，但3-400呎總係可以做到嘅，香港人住得大啲，怨聲都少啲啦。