林鄭對收回高球場SAY NO

畢二居

網圖

土地供應專責小組稍後會向特首林鄭月娥遞交中期報告，年底再交全面報告，但小組似乎報告未交已全面被廢。最新說法係小組大力煲熱的收回高爾夫球場方案，已被政府高層吃閉門羮，如果呢個講法無錯，相信小組會不甘受辱，全力策動反撲。

畢二居早前從行政會議成員提議用儲備大力填海，但隻字不提收回高球場，已經聞到味，政府未必會收回粉嶺高爾夫球場，再加埋民政事務局早前提交私人遊樂場官契續期政策檢討報告，建議私人體育會在續約時，補地價須大幅提高，以及加強規管批地條件，擺明政府係唔想收場，於是提出中間方案。

近年部份人大力推動收回高爾夫球場，個別推手仲加入了覓地小組，加上同政黨大合唱，收場似乎係劫富濟貧、一石二鳥的妙計，輕易就可佔取道德高地，呢樣對特區政府來說係好大誘惑。

不過，高球會也不是省油的燈，除了公關不停出招，背後仲有不少人出謀獻策，兼且幫手發功，其中一樣係球會拉攏到一班老外支持，仲國際間大力維護球會地位，呢屆政府特別著重國際意見，呢點可從特首林鄭月娥經常外訪睇到，外面講一句，可能好過自友講十句，皆因香港定位係國際城市，無理由連個搞國際賽的球場都保唔住。

覓地小組又一個選項被打殘，相信個別成員會非常不滿，如果消息仲未証實，若然到確定交待時真係唔收場，小組可能大鬧當局唔尊重民意，對唔住劏房戶。不過，特首出名好打得，而且小組係佢自己捧出來，就算嘈完都見唔到會有乜後果，總之搞填海、公私營合作、再加開發棕地就成為主菜，收番高球場就會SAY NO。