橋頭經濟險變歷史名詞

畢二居

網圖

港珠澳大橋通車後，大批觀光客湧入東涌，令居民大為不滿，但在區內開設商場的發展商就開心不已。

港珠澳大橋吸引內地旅客追捧，皆因此橋在內地獲傳媒廣泛報導，知名度甚高。相反，在香港多聽到潑冷水的質疑，擔心大橋無人用。未知是否大橋的高難度部份皆因內地完成，無得攞威，港官對此亦懶懶閒，連開動的大日子都好似突然爆出。

大橋現時塞滿人，究竟是三日香，抑或會愈來愈旺尚待觀察。不過，受影響的東涌居民早就失去耐性鬧爆，出現這個情況，皆因政府無做好準備應接人潮，至於曾經係前朝講得鬧哄哄的橋頭經濟，更加被拋諸腦後，所以旅客大軍一到就出現亂局。

橋頭經濟係上屆政府一度講到開巷，當時主張最力係地產大好友林奮強，此君對香港前景出名看好，倡議要迎接黃金十年，包括係機場同大嶼山一帶大興土木，發展商場，分流來自機場同深圳的人流。不過，佢因為賣樓惹麻煩，被廉署調查雖然無事，但就離開了權力中心的行政會議，慢慢他的建議逐漸丟淡。到了政府換屆，大橋無人講，更何況甚麼橋頭經濟！

前朝政府四出搶地、推地，今屆政府就變招改為慢慢諮詢。前朝政府想大起商場，今屆政府就當無件事。若然不是內地大軍殺到，橋頭經濟幾乎變了歷史名詞。如果時光可以倒流，大橋人工島一早就增設商場，咁東涌居民今日，又何必變成個個躁底呢？