民間特首sell填海 人工島真係無懈可擊？

網圖

「值得做的事，馬上做」，團結香港基金早前健議喺香港島同大嶼山之間水域，建造一個面積2,200公頃嘅人工島，興建最少25個住宅單位，最近仲搵埋民間特首劉德華做旁白，實行力谷填海起屋。

董建華係團結香港基金主席，可能睇到啲端倪。大家仲記唔記得「八萬五建屋計劃」？呢項政策係老董喺1997年度施政報告提出，希望每年提供至少85,000個住宅單位，等全港七成家庭十年內有自置居所，輪候公屋時間都短咗。

不過當年推出政策時撞正金融風暴，加上種種原因，好多人都話「八萬五」搞到樓市大跌七成，搞到個個負資產。唔通老董覺得當年搞唔成「八萬五」，而家就借林鄭，搞填海起屋，谷返佢嘅房屋理念？

一直有唔少團體反對興建人工島，認為香港其實夠地，只係政府喺人口政策同資源規劃上失策。甚至有環團認為起人工島係「逆天而行」，忽略建設人工島時可能會遇上極端天氣，難以施工。仲有錢呢？填個海要幾多億？會唔會爛尾？

政府應該要喺超級颱風「山竹」中汲取經驗，梅窩碼頭完全被淹浸，近海地區好似杏花村同將軍澳，都被破壞得體無完膚。試想想如果起咗個人工島，遇上天災時隨時會變成叫天不應嘅孤島，加上香港啲基建工程錯漏百出，沙中線就已經係一個好例子，實在難令人有信心。