泛民輸補選 住屋問題政府冇得再瀨皮

網圖

九龍西立法會議席補選由代表建制派嘅陳凱欣當選，李卓人落寞企喺選舉台上，意味泛民連議會內嘅分組點票權都失卻，以後有建制派喺立法機關全力合作，政府施政上更如取如攜，咁係咪代表填海呀，收地呀，發展郊野公園邊皮呀，無咗泛民「阻頭阻勢」，就可以全力去馬，房屋問題有望好快解決？

前特首梁振英曾經話，老董推出嘅「八萬五」房屋政策，最衰係「反對派」搞搞震，令政府要撤回政策， 而親中團體過去亦經常批評，反對派反對所有土地開發政策，乜都司法覆核，又係議會拉布，令香港增加房屋供應停滯不前，住屋問題惡化。中原地產創辦人施永青都話，如果政府供應到足夠土地，泛民就冇咗攻擊政府嘅子彈，所以泛民實反對增加土地供應云云。總知，佢哋口中，樓貴最衰都係泛民。

好喇！今次選舉之後，泛民喺議會內已無力抗衡建制集團，分組點票又唔夠反對票，想拉布又會俾大主席同委員會主席踢走，咁宜家政府政策路路暢通，想起幾多個人工島都無問題，收返哥球場、收返啲棕地、收舊樓重建更加係no problem啦！無咗反對派呢塊遮醜布，政府再冇借口係房屋供應問題上碌碌無為，下屆議會選舉再解決唔到高樓價困局，難免令一班支持建制嘅選民失望，到時林鄭點對得住朋友？