無謂整色水 推公私合營

畢二居

來源：資本雜誌

政府成立土地供應小組展開「土地大辯論」，點知地未搵到，先引起無地大恐慌，買家前赴後繼入市，令樓價連升多月，單係今年已經升咗一成，如以同樣速度，一年樓價升一成半，好多儲首期人仕辛辛苦苦儲錢入紅薄仔，結果愈儲離置業夢想愈遠。買家咁心急買樓，連美國話明要再加息都聽而不聞，要多得土地小組用的恐慌策略，高調宣布土地短缺程度超乎原先估計，相信未來十年八載都不能解決。

覓地小組話土地短缺好難快手解決，港大學者就醒過佢哋，提出發行「土地債券」，通過換地及發行土地債券，讓土地業權人交回農地俾政府，從而加快整合及發展新界私人土地，釋放土地建屋。

建議提出後，有記者就話呢個做法好似當年政府的換地權益書。學者就話兩者不同之處，係當年有完整規劃先至收地，好似沙田新市鎮，就係咁樣覓地發展出來。

換地權益書講明有拖無欠，令地主願意同政府合作。當年港英政府無錢，想出換地權益書，堪稱絕世好橋。本來，橋不怕舊，最緊要受，學者今日重新包裝呢招又得唔得呢？

好橋翻炒唔可以話一定唔得，但亦要明白世界已經不同以前，最重要是無論港府抑或發展商，大家都係有錢無地。曾經擁有最多換地權益書的發展商中，南豐發展係其中之一，但早前公司行政總裁梁錦松都自嘲，話南豐係無地的地產商。南豐早年有大量換地權益，用來換了將軍澳的靚地，用來發展南豐廣場等大盤，可惜好多都係樓市低潮時推售賣清，所以吸收咗過去經驗，而家手頭有地的發展商，相信都唔會隨便「借地」，因為邊個知道今日借咗地，他日會不會被人順便收番，賠錢不賠地？

再者，既然土地咁珍貴，發展商肯定都要高回報，變相做「地皮大耳窿」，咁搞法未來政府咪仲無地？

學者愛動腦筋，但有時想法太過刁鑽。早知燈係火，何必隨街摸，政府如果為了可以早日覓地解決燃眉之急，連向發展商借地都肯諗，咁不如叫覓地小組唔使再整色整水，由當局力推公私營合作，直接就叫發展商擰地出來齊齊玩好過。