煥然懿居重建戶單位冇人要 壹居122伙點算

互聯網圖片

今日食飯睇新聞，望到煥然懿居市價43伙單位竟然冇人到。坦白講，佢咁嘅價錢，有人到都偷笑啦。

同大家講返啲基本資料先，煥然懿居總共有493伙，其中43伙以市價賣俾受重建影響嘅業主，嗰批單位實用面積介乎284至574呎，售價大約552萬至1,240萬港紙，圍返來大約萬9至2萬1蚊一呎。我睇大家睇到呢個價錢，相信反應只有一個，就係「哇~~~」

假設你係嗰班業主其中之一，你會唔會去用市價買呢個煥然懿居，我諗9成9人都唔會。嘩大佬你開到個價咁高，仲邊會有業主同你講呀。萬9蚊呎，我去睇其他新盤好過啦，土瓜灣Downtown 38呎價都係萬7萬8左右，觀塘凱匯咪又係萬8至萬9蚊呎，再遠啲去到新界天鑽、逸瓏灣呢啲，雖然交通可能有啲唔方便，但係呎價都係萬零蚊呎，咁多好選擇，使唔使揀煥然懿居呀。

其實睇返上次煥然壹居，當時受重建影響嘅業主嘅反應都係非常冷淡。可能市建局都驚中伏，將上次預留俾重建戶認購嘅146伙大幅減至43伙，但好可惜歷史始於又一次重演。煥然壹居到依家都仲有122伙未賣，準備喺今年5月中開賣，並賣俾喺大角咀受重建影響嘅業主，但睇到煥然懿居43伙都賣到咁嘅景況，我諗壹居個情況都堪虞㗎啦。