理得你五二折 居二業主繼續扑傻瓜

網圖

娥六招出咗大半個月，以後買新居屋有52折，但幾十人爭一個單位，市民即使合資格申請，都唔敢幻想自己會抽得到，唯有寄望消息令居二市場樓價回落，到時買二手居屋仲實際。

的確，政府出招後部分居屋業主肯減價，但主要集中係天水圍、屯門呢啲偏遠地區，相反市區居屋業主仍然有恃無恐，繼續叫天價，務求扑中傻瓜，自己貼好少錢，甚至唔洗貼就夠錢換私樓。

睇返數據，剛過去半年，平均每宗第二市場居屋成交價都接近500萬。呢排就日日有公居屋破頂成交新聞。好似將軍澳景林邨一個實用485呎，自由市場價以600萬沽出，成為最新公屋王；噚日又有大角嘴富榮花園一個實用694呎嘅單位 ，以自由市場價1,065萬賣出，創居屋新高價，亦係首宗千萬居屋成交紀錄。

可能你話，以上2個都補咗地價，我有綠表吖嘛！sorry囉，長沙灣樂年花園一個827呎單位，綠表市場價都880萬元賣咗，創九龍綠表居屋新高。

雖然林鄭係10月嘅施政報告好可能再有新招，但係好多買家都等唔切，搶住入市，居屋業主就繼續樂於將早年百零萬，甚至幾十萬買返嚟嘅單位，用四、五倍價錢賣俾下手，真係肥到瞓著都識笑。