等政府放寬辣招蚊都瞓啦！

上車男

網上圖片

近期樓價稍為回軟，個別地區做出一些叫價下降一兩成的成交，甚至號稱有蝕讓。

上車男經常去睇樓，可以告訴大家，我就不覺得樓市跌左好多。在香港開始加息之後，樓價氣氛的確有多少影響，但業主叫價相當強硬，上車男睇盤有時嘗試還價低兩成，根本業主就完全唔吼。這個是買家和業主都企硬的局面，買家覺得樓價貴，業主就唔肯減價，所以就交投淡靜，代理中棍。難怪大代理行都話要裁員二百人。

有些人很天真地話樓價下跌，叫政府放寬辣招，上車男就對辣招又愛又恨，既覺得有辣招存在可以約束樓價喪升，但政府收緊按揭，其實令一般小市民更難上車，試問如果不是有父幹，樓價咁貴，小市民又如何拿出三、四成首期、幾百萬來上車呢？變相焗買發展商有提供二按的新盤，但新盤又認真不平宜，所以理論上，如果政府減辣，特別在按揭方面放寬，的確有助上車男這類人買樓。

不過，現實一點來看，樓價跌得咁少，政府亦不會在現在減辣，否則好容易樓價一個轉身就向上抄，政府就被人罵到趴街，所以，財爺話樓價再跌考慮放寬按揭成數，都係信一成先啦。等政府放寬辣招，實等到蚊都瞓啦！