收返高球場風向有變 建制派勿跟車太貼

Source: Internet

土地供應小組又傾到應唔應該粉嶺高球場，原本諗住都係冇共識，嘥鬼氣，不過令人意外嘅係，幾個問責高官係會上竟然冇對收返高球場不置可否，發展局局長黃偉綸仲話對收回持開放態度，同兩個月前有傳媒報道話政府傾向唔郁高球場，風向睇嚟有變。

之前有傳媒放風，報道政府高層考慮後，傾向唔收回高球場起屋，因為佢 係體育發展上有角色。但事隔2個幾月， 同一間傳媒又引述消息話，鑑於坊間有較多意見要求發展粉嶺高球場，搵地小組傾向推薦收回球場發展，現時小組對球場嘅態度已是「不是收不收回的問題，而是收幾多的問題」。睇嚟到小組下月底交報告個陣，政府係民意下都好難完全唔郁高球場。

事實上，高球場喺內地已成為禁忌，甚至係貪腐嘅象徵，近年大陸政府都大力針對高球場，隔岸嘅深圳，今年中都收返一幅高球場用地發展，港府收返高球場起樓都順理成章，一嚟表示同中央行動一致，政治很正確，另一方面又順應民意。

下個月林鄭上京面聖，可能會得到啲啟示，大家記得聽實一班建制議員嘅口風，如果連商界代表都歸隊，異口同聲話發展高球場有得諗，到時傳媒記得再搵荷蘭叻出嚟做訪問！