「菁雋」搵老襯 100萬都唔值！

屯門友

網圖

有發展商講到128呎「龍床盤」理所當然，作為屯門友真係火都嚟！今次屯門友想同大家分析吓呢個新盤「菁雋」。

「菁雋」位於屯門景峰，交通尚算方便，附近有景峰輕鐵站，行去屯門西鐵站大約15分鐘，亦有好多巴士經屯門公路出市區。

不過呢個新盤嘅配套麻麻，除咗一間細細超級市場同埋餐廳，其餘乜都冇！圖書館、泳池、運動場、公園、商場、街市統統欠奉，旁邊仲有兩個垃圾站，可能有臭味傳出，衛生環境一般，加上周邊食肆多，成日有米奇出沒，細膽啲都嚇死。

「菁雋」係單棟式設計，四面都畀馬路包圍，大塵之餘仲非常嘈，而附近馬路成日泊滿車，住得呢度預咗樓下成日塞車，人車爭路。

雖然「龍床盤」未開價，但菁雋131呎開放式單位入場費都要285萬，呎價2萬幾，難怪個個話唔值。睇返近年地產行情，隔離景峰花園都係萬一蚊呎，何必要俾近300萬，住間比車位更細嘅單位？呢啲咁嘅盤，100萬都俾多佢，又睇吓今次佢賣得出幾多伙？