覓地小組廢 政府胡亂來

上車男

來源：互聯網

覓地小姐終於在12月31日交了報告，報告也一如所料地廢，提出來最優先的覓地建議是找棕地起樓，而這個建議就係來自四圍做問卷，找最多人支持的意見。好話唔好聽，問多兩句棕地係乜，受訪的市民都唔知道，這些意見真係唔知有幾高的價值。

第二個意見就是收回少部份高球場來起樓，這個建議聽起來動聽，做起來不實際。行政會議召集人陳智思加埋把嘴，傳聞話他四出同人摸底，想話聽覓地小組的建議收回粉嶺高球場32公頃土地，但不用來起樓，而是用來作公眾球場或改建公園等等。這個真是蠢到無倫。

政府明知收回高球場會被人鋤佢不尊重高球運動，而粉嶺高球會也可能會申請司法覆核，拖得十年八載，根本起唔到樓，但又不好意思講這些理據出來，結果就走出陳智思這些收回高球場但又不起樓的建議。咁問題就來了，那麼為什麼要收回高球場呢？對於我們這些趕住上車一族來說，收番高球場，接著又繼續做公眾高球場或用來做公園，咁收來幹麼，不如唔收好過收。

我覺得政府就是這樣，搞埋D無謂嘢，先搞左一年無謂的諮詢，得左D好廢嘅建議，接著在一些不切實際的問題上爭論不休，講來講去都說不出如何快速增加土地供應。無論公私營合作也好，近岸填海也好，本來都是可以比較快增加土地供應的方式，但政府又怕被人話官商勾結，又怕唔環保，做都不敢做，只想做些政治正確的事，不是想為小市民解決真正的問題，真係想唔鬧佢都唔得啦！