通州街建過渡屋 隨時吃力不討好

網絡圖片

近日有報道話政府打算拎啲閒置地皮出嚟興建6層高嘅組合屋做過渡性房屋，選址就喺深水埗欽州街西同通州街嘅交界，佔地大約5千平方米，預計可以提供260個單位。

欽州街西同通州街嘅交界就咁聽可能唔明喺邊，其實就係喺通州街橋底旁邊。小弟作為一個居住喺深水埗廿幾年嘅人，閒日冇乜事都唔會走去嗰頭行，因為基本上嗰頭有大量嘅露宿者之餘，仲可能有人喺嗰度吸毒，打鬥等等，行過都避之則吉。

交通方面佢都唔上唔落，幾乎係深水埗站同南昌站中間，兩邊都要行差唔多10分鐘先去到地鐵站。佢個位附近仲有幾條大馬路，噪音空氣污染點睇都走唔甩。

當然佢始於都係過渡性房屋，無謂要求咁高，不過我係擔心入住喺組合屋嘅人啲安全啫，當地問題唔係一朝一夕嘅事，我諗政府亦唔會為咗區區過渡性房屋而決心改善，所以可見將來治安、空氣污染等都唔會有好轉跡象。

有人會話有地方住總好過住劏房、政府拎地出嚟唔好嫌三嫌四、政府已經絞盡腦汁搵地云云，我好理解政府面對現時住屋問題已經多管齊下解決問題，但政府唔能夠片面解決問題，如果啲人入住後要面對治安差等問題，最後政府都只會吃力不討好，拎地出嚟俾人住仲要俾住客罵。