長實的風涼話

網圖

最近樓市劈價新聞一單接一單，CCL指數都已經連跌8個星期冇咗4%，新盤銷情靜過鬼，以最近兩個新盤為例，深井逸璟．龍灣首批推50伙，賣得6伙；另一個四叔盤尚悅．嶺發售102伙又係賣得6伙。但最奇係有發展商仲話要加價加推，完全違反經濟學定律。

其實無他嘅，發展商唔係唔知時不與佢，而係呢個Moment冇得佢減價，事關過去樓市旺市，佢哋賣出咗唔少樓花又未入伙，如果宜家玩劈價，之前落咗訂嘅買家見蝕到入肉，做咗傻仔，好大機會出現撻訂潮，雖則話發展商可以沒收訂金，但係之後收返嘅一堆單位，劈價都未必有人接，特別係個啲奇則劏房，加上賣唔出又要俾空置稅，所以大批新盤入伙前，一定死命頂實個價，打死唔減，寧願送下影音器材禮券、抽吓電動車咁。

但到買家真係完成交易，發展商唔再怕你撻訂，你估佢哋為咗去貨，仲會唔會減價？你睇吓觀塘凱匯個開心價就明。連長實樓神趙國雄話俾你知，佢係賣樓都唔睇好出年樓市，整體要跌一至兩成，山旯旮納米樓更要跌三成，已經好保守啦。誠哥睇市有幾準，大家都知啦，新樓已賣得七七八八，中環中心又甩咗手，現金袋袋平安，借埋俾高銀收高息，當然有資格講真心話。