阿信屋老闆的悲歌

畢二居

CEC國際(0759)主席林偉駿 網圖

759阿信屋的CEC國際(0759)主席林偉駿逝世。「759阿信屋」，高峰期分店達二百七十一家，目前分店約二百零九家，坦白講，就算係高峰期佢檔生意都唔係大，佢有啲知名度，都係因為鋪面接觸到市民，加埋報紙成日唱，於是令佢個名咁大，亦可以講，佢係有名無利，無乜著數。

林偉駿本來係廠佬，早幾年內地做廠條件愈來愈差，有人改為搬廠，有人就轉行，佢就走咗去開鋪頭，仲經常上報，成為風頭躉。不過，正如好多做零售生意的老闆，辛辛苦苦做埋，埋唔夠交租，絕對係勞心勞力。

759阿信屋大肆擴張時期，正值自由行高峰期，當時簽落好多貴租租約，後來市道轉向，咁佢就食到應。呢幾年租金回落，但佢捱貴約之餘，又要面對勞動力不足，基層工種請唔到人兼薪金急漲，加上行家夾擊，就算係鐵人都唔易頂，何況佢中風又有糖尿，身體咁差。林偉駿轉行無搞地產走去賣零售，結果譜寫咗事業上的悲歌。

其實，無論係香港抑或大陸，做邊行生意都無做地產咁好。內地設廠條件惡化，但好多廠佬如果塊廠地係自己，賣咗塊地已經賺到笑，點使日夜操勞擔心。所以做零售最主要係攞啲資金去投資物業，雖然只係做個小投資者或大炒家，但肯賺吓錢易好多，好似海天堂早幾年俾人爆料，係網上放出整龜苓糕的負面視頻，鬧出一場風波，但老闆最近接受訪問，都話雖然被人整得好慘，但好彩買咗批鋪，可以捱過風浪，而家仲夠食過世，所以話係香港做七十二行，最好做始終係做地產。