首置盤傳378萬上到車 預咗爭崩頭

圖︰香港01

首置上車盤係特首林鄭月娥重建置業階梯嘅重頭戲，上班收入居屋之上、私樓之下嘅家庭望穿秋水，終於喺娥姐上任一周年前夕等到，宣布將市建局馬頭圍道重建項目，變做第一批嘅首置盤，市建局董事會嚟緊星期二(24/7)會開會，傾馬頭圍道項目嘅折扣率同轉售限制，有消息話批單位好可能六二折出售，即係最平378萬可以上車。

多間傳媒引述消息人士話，馬頭圍道碰目單位260至507呎，如果用市建局6月底嘅估值2.35萬一呎計，六二折出售即係呎價大約14,570元，所以單位售價介乎378.8萬至738.7萬。如果市建局董事會通過，最快12月推售。

由於「首置盤」申請對象入息限額最高去到7.41萬，係比較高入息嘅家庭，拎咗折讓買樓轉售限制要更嚴格，買入單位頭5年唔准出賣或者出租，5年後要補咗地先可以喺自由市場賣，唔俾居二市場賣俾白表人士。加上市建局不設回購機制，即係樓市如果跌，買家要自己承擔風險。但重點係得493個單位，都係個句，抽到先算啦......