香港出年經濟有隱憂 樓市可以不受影響？

網圖

樓價相比去年8月高位已跌咗6個%，好多專家話香港經濟仍然強勁、失業率低、出年又有人工加，樓價跌一成購買力已吧吧聲湧晒出嚟撈低，唔好幻想樓價會跌太多。但事實香港經濟又係咪專家講得咁好？

政府統計處公布，香港11月出口貨值按年下跌0.8%，遠遜市場預期增長7.7%，睇嚟貿易戰嘅影響陸續浮現。 另一條新聞亦夠晒觸目驚心， 銅鑼灣、中環嘅旺舖租金都大插水，有啲更要減租一半求客，昔日天價租舖嘅Forever 21、A&F都走夾唔抖，零售業有幾唔掂，唔洗多講。而訪港旅客今年雖達6,000萬人次創4年新高，但只係表面風光，唔過夜內地客比例大升，好似港珠澳大橋開通吸引一大堆消費力唔高，只係擾民嘅低端客，反而非內地旅客增幅持續放緩。

香港股市由今年初3萬3高位，陰乾式跌咗8,000點，股王騰訊股價一年間更冇咗差近一半，一班新上市嘅大陸獨角獸新經濟股更令到捧場客損手爛腳。畢馬威、安永預計出年香港IPO集資額按年減三成，對金融業嚟講，都唔好話唔傷。

而對樓市啟示最大嘅地價，尋日中海外以貼近市場下限大約80.34億，投得啟德跑道區第三幅住宅地皮，樓面呎價13,523蚊，比高銀上月投得嘅地皮跌咗一成三。

外圍經濟風起雲湧，睇嚟出年好大機會最先出事嘅係港航，如果真係出現債務違約，甚至要裁員，會影響大批員工嘅飯碗。樓市最講信心，如果香港失業率上升，市民對置業信心下跌，今日仍然喺高位嘅樓價都難以守得住。奉勸各位，入市前先睇清香港經濟走向。