馬哈迪禁外國人買森林城市 林鄭又做咗啲乜？

大馬總理馬哈迪 網圖

大馬總理馬哈迪上台後，頻頻推倒前朝同中國合作嘅基建項目，呢兩日甚至講明，唔歡迎外國買家嚟買貴大馬樓，唔賣俾當地人嘅「森林城市」項目唔該過主，大馬唔會為他人作嫁衣裳，實行要搞「馬人馬地」咁話。

除咗大馬，新西蘭無幾耐前亦推出禁令，海外買家唔可以再買當地現樓；澳洲、泰國、越南，甚至中國內地，都有唔同程度嘅限外令，限制外地人唔可以買二手樓或者買入數量。噚日連柏林市長都出聲，話考慮唔俾外國人買當地樓。各地政府紛紛保護本地人買本地物業嘅權利，希望居民唔洗變成樓奴。

好可惜，香港嘅外地買家限購令一直只聞樓梯響，本地樓市依然充斥「港珠澳大橋、高鐵一通車，內地人實嚟搶樓啦」、「中國有1%嘅有錢人嚟買，港樓都冇得跌啦」、「香港樓邊度係俾香港人買㗎？」嘅思維。雖則數據反映外地人買港樓比例，或者冇市場諗嘅咁多，但只係個種心理預期，已足以令樓市持續亢奮。

當一個個國家嘅政府，都推出政策保障自己人置業嘅權利，香港政府喺呢方面做咗啲乜？除咗已經近乎失效嘅bsd ，就只係用自由市場做擋箭牌，任由基層俾高樓價魚肉。一啲官員同「成功人士」甚至叫後生仔離開香港，返大灣區置業，如果換著喺其他民主社會，一早要出嚟180度鞠躬道歉，或者俾選民踢咗落台啦。