驚見胡應湘撐填海

畢二居

Source: Internet

合和主席胡應湘近日風頭甚勁！先是他出來力挺填海，而且唔止話填1700公頃，直情話要填夠2000公頃，跟住港珠澳大橋落成，呢個係他的大橋夢，現在不單止成真，兼且仲有國家主席習近平主持開幕禮，作倡導者都勿話唔威水。

港商之中，講錢財勢力胡爵士唔入三甲，但講眼光同識見，他就有本身的江湖地位。好似當年他瞓身投資港深廣高速公路，一注獨贏，如果順手係沿路圈地，而家合和土儲可能勁過碧桂園。又好似他倡議起伶仃洋大橋，就係今日港珠澳大橋的前身。

胡爵士眼光超過，但聽到他挺填海，就真係有點不知是驚是喜。喜的原因很簡單，有重量級人仕支持，當然無任歡迎。驚的是胡爵士一向語出驚人，而且眼光超前，他提出的大計好多都幾十年先能完成，「明日大嶼」本身已經係以十年計的項目，若然再歎慢板，真係不知何年何日才完成。

胡爵士的大計想象力豐富，要落實絕不容易。好似港珠澳大橋係上世紀八十年代提出，當時內地根本無錢興建，車費也不是普通人能夠負擔。現時大橋夢成真，但整個設計加多了隧道，又整多隻腳落澳門，同當初的構思其實相去已甚遠，若然不是國家大力支持，恐怕都不是咁易完成。

「明日大嶼」提出之後，不少人對設計有質疑，譬如是否應該起咁大？究竟是否需要起咁多個島再用橋樑連接，令工程費貴上加貴？種種問題估計有排拗。同一時間，環保人仕對項目群起反對，胡爵士愛搞，過去亦係他們心目中的共同敵人，現在他建議加碼填海。係咁環境下，聽到他加入戰團，你估政府是否都會有點擔心呢？