高呼減辣係打心理戰

畢二居

網上圖片

樓價係中美貿易戰下出現回落，從市場交易睇，估計樓價指數仍然維持一段時間下跌。雖然樓價只係初現跌勢，但已有議員要求減辣。

過去兩個月樓價由升轉跌，雖然跌幅仍然輕微，以現今水平計算，今年樓價仍然有近7%進帳，比起股市已見十五個月低位，買磚頭又贏咗買股票一仗。

樓價至今仍然係大漲小回，但代表商界的議員林建鋒日前就開腔，話擔心樓市下跌，會影響商界向銀行借錢，故此要保住樓市，提倡減辣。對於呢個建議，金管局總裁陳德霖呢個星期上立法會時回應，亦無話佢「憨居」，只係話樓價是否進入下跌周期仍然要觀察，所以無計劃減辣，又估計樓市唔會出現過去災難式下跌。

過去十幾年，樓價基本上大漲小回，就算係二零零八年出現金融海嘯，樓價回調只係好短時間，亦無造成好大震盪。現時樓價由年頭瘋升稍為回落，商界議員已經高叫減辣，實在有點「大喊十」。從政治上來說，減辣一旦推行，萬一樓價又爆升，政府豈不是被人鬧到失暈，故此辣招易放難收，樓價不是深度調整，恐怕不會咁易減辣。商界議員叫政府撤銷限制，多少都係以攻代守，打吓心理戰。

美國最新數據顯示，薪酬上升比市場估計快，有可能加劇美國通脹，數字出籠後，專家認為美國年底加息幾乎再無懸念。美息向上勢頭未止，議員呢個時候大聲疾呼減辣，成事機會等如零，但至少可以起到分散注意力，發揮一點撐樓市同促銷新盤的效果。