高地價思維深入骨髓

畢二居

來源：香港01

樓市繼續高溫，雖然政府喊哂口話要移山填海，成日被人話好廢的覓地小組日日出來做宣傳，但市民大眾都係唔信政府覓唔到地。呢個場景下，二手居屋造價終於突破千萬元，搞到想上車的小市民弱小心靈再受打擊。

二手居屋造價過千萬，業主賣樓收錢當然和味，但正如我先前講，買居屋唔係咁著數，皆因賣樓升值要同房委會分身家。小市民買資助房屋想搵政府著數，根本上難乎其難，掉轉頭小業主揸住層樓咁耐，最後仲要因為有地價尾數未清，事隔多年要同政府分身家。

政府係地價上絕對唔會益市民，最明顯例子係而家當局打著旗號話要俾市民買可以負擔的樓宇，實際上佢只係好似發展商俾你九成按揭咁，俾你上車易啲，日後要還，而且仲要辣啲。而家無論居屋、首置盤，首置訂價稍為調低，勉強俾升斗市民攀到車邊，但同一時間已經殺聲震天，話要收緊轉讓條件。呢個原則講得白啲，就係唔想益你。

官僚係制訂房屋政策時永無益人，近乎係條件反射，呢個係經歷過去近百年由殖民地政府培養出來的高地價思維。負責地政的官員，無論收到上頭乜嘢政策，第一步就係要維護土地收益，捍衛高地價政策，呢個價值觀一早就入咗骨髓，係血液裏面流動，供應緊用來思維的大腦。

官員對高地價的堅持植根深層次意識，從好的一方面係維護咗庫房收益，香港能夠咁低稅制，教育、醫療福利又唔錯(其實醫療福利正在迅速倒退中)，仲可以維持咁多盈餘，主要就係有土地收益，所以當年中英埋牙傾交回香港主權，好快就特別成立咗中英土地小組，用來睇住買地收益，兼且限制住唔准亂賣地，呢個想法根本到而家都無變過，成為真真正正的本土價值。